Gruuts en mèt väöl plezeer proclamere de Tempeleers en Stiechting de Maaskluivers de Jäöghoeglöstegheid vaan Groet Mestreech.
PRINS TIES I Kräölerikus Trompeterikus Maasköperikus Gevolmachteg jäögambassadeur vaan ’t riek vaan Jocus Successor vaan de Neutetikkers en de Beerbieters Conservator vaan de Bajkes vaan de Spekstraot tot de Pasestraot Hertog vaan alle boetespeulende kinder Groetopziechter vaan de hoeswei Groet jäögambassadeur vaan alle meziekmakende en speulende kinder Protecteur vaan de Mestreechter Jäögvastelaovend |
Ties I, in ‘t börgerleve Ties Gerards (zoon vaan Carl Gerards en Lenny Gerards-Ubachs, groete broor vaan Sjef) is 11 jaor joonk en is op 27-10-2013 gebore in Venlo.
Zien jäögprinselek pelies bevint ziech op de Spekstraot 26 in Borgharen.
In ‘t daogeleks leve geit de jäöghoeglöstegheid nao sjaol in gròp 8 vaan apekeutelesjaol de Maasköpkes en is heer ouch kleinzoon vaan aajd sjaolmeister en naomdreger vaan ’t sjaolplein Math Ubachs.
Op sociaol-maotsjappelek vlak maak heer ziech oonder andere verdeenstelek bij Fanfare Sint Cornelius es trompöttis en is heer mèssendeender in de kèrk vaan Hare. Neve späölselkes speule op d’n X-box is heer (bij good weer) dèks boete mèt zien vrun en hèlt heer vaan fietse, sjotte en hutte bouwe.
Vaanaof noe regeert heer euver de Jäögvastelaovend in Groet Mestreech en zal heer de koumende weke, neve of in harmonie mèt de gebrukeleke activiteite vaan de Maaskluivers, op ’n aontal belaankrieke eveneminte zienen zjwajeuzen entree make:
Zaoterdag 8 fibberwarie: | Bekindmaking winner Kinderexpositie (MUMC+) |
Zoondag 9 fibberwarie: | ’t Groet Kinderfies (Complex) |
Zaoterdag 22 fibberwarie: | Jäögprinsetreffe (Sterzaol) |
Donderdag 27 fibberwarie: | Jäögmachseuverdrach (Stadhoes) |
Armand Peereboom, oetbelder vaan de Tempeleers: “Veer zien d’r gruuts op wie de jäöghoeglöstegheid vaan Groet Mestreech steeds mie vörm kreig. Zoe zal heer dit jaor tijdens de jäög-machseuverdrach op ‘t Stadhoes nou ouch ’n eige, mèt de hand gekalligrafeerde, troenreie ten gehure bringe. Ouch de nui traditie mèt betrekking tot ’t op- en aoflaote vaan ’t jäögsymbool aon de gievel vaan ‘t Theater aon ‘t Vriethof is us enorm good bevalle. De ziechbare emotie op die geziechskes steit ouch bij de volwasse touwsjouwers in de memorie gegrif es sjevraojemomintsjes die mennegein op dat momint evekes hiel klein maakde.”
Jäögsymbool ’t Nui Leech weurt op carnavalszoondag, veuraofgaond aon ‘t insjete en in ‘t bijzien vaan de Stadsprins en garderizzjemint de Kachelpiepers, opgelaote aon de gievel vaan ‘t Theater aon ’t Vriethof. Es op carnevalsdinsdag um 17.00 oor de lètste klaanke vaan ‘t Zate Hermeniekes Konkoer ’t Vriethof sere, liet de jäöghoeglöstegheid dit symbool weer sirremonieel zakke.
De jäög-machseuverdrach is ouch dit jaor weer via ‘ne livestream te volge en weurt in samewèrking mèt de sjaole gecombineerd mèt n lierzame activiteit.