De medaajes die Zienen Hoegen Hoeglöstegheid dit jaor oetreik aon doezende Mestreechtenere kinne es thema ‘de Koejong’ en ‘’t Riddekuulke’. De Groeten Oonbekinde zal op oetroopzoondag ouch es koejong nao zien benkelek momint weure gebrach.
Prinseorde: de Koejong
Sjäör in de brook, de haore doorein, de han zwart esof ze de kachel hadde gestook. De oondäög straolde devaanaof, en edere manneleke Mestreechteneer is ’t oets gewees: koejong. Ouch Zienen Hoegen Hoeglöstegheid waor ‘t in zien jäög, en daorum is zien Prinseorde dit jaor ‘de Orde vaan de Koejong’. Joonk en aajd: in ederein sjuilt eine. D’n eine hèlt ‘m e bitteke oonder controle, d’n aandere liet ’t gebäöre.
Wie veer nog koejonges -of batteraove, of strabenders- waore, waor ‘t leve heerlek euverziechtelek. Boete mèt dien vrun doen en laote watste wèls. Binne de sjraom, en aoventouw toch ouch evekes deboete. Dat huurt bij ‘t zien vaan ‘ne koejong. En in dat geval waors ‘t veural zaak um oet han vaan de govie te blieve. Allewijl kumpste daan mesjien bij ‘Bureau Mestreech’, meh vreuger woort de koejong es de govie häöm trappeerde mètgenome nao de Vriethof. Es pa diech dao mós koume hole, hadste ‘t pas ech veur d’ne priester. Noe veer get awwer zien, en ‘t leve soms in raozend tempo veurbij flits, is ‘t heerlek trök te dinke aon deen tied: kóste veer nog mer ins koejonges zien…
Tempeleersorde: ’t Riddekuulke
’t Thema vaan de Tempeleersmedaaje vaan dit jaor stamp nog oet d’n tied wie veer allemaol doordeweekse kleier hadde en zoondagskleier. Vaan door de week de zoondagskleier aondoen waors gein spraoke, dat doog me neet of dao mós get hiel bezunders aon de hand zien. E fies, e zjubbelei of ’n begraffenis. De dames hadde zier zeker zoondagse kleier. Dao pasde geine sjolk op, want ouch dee woort allein door de week gedrage op de doordeweekse kleier. De sjolk veur de zoondag waors ‘ne grote witte mèt e veurpand veur de boorste. Zoe huurde dat destijds en neet aanders.
Mam had gemeinelek versjèllende soorte kalbasse in kleure die pasde bij de versjèllende mantels en mantelpèkskes . Die waore veur de zon- en fiesdaog en waore vaan ’t sjoenste leer. Door de week woort de kemissiekalbas gebruuk die in Mestreech de prachtege naom droog vaan Riddekuul of Riddekuulke.
Dat waors ’n sumpel kalbas boe zelfs eerappele in gehaold kóste weure en dus bezunder steveg waor mèt lere hingsels. Eus Tempeleersmedaaje vaan dit jaor hèt dus: ’t Riddekuulke.
Oetrope
De Groeten Oonbekinde zal op zoondag 2 fibberwarie verkleid es Koejong op de oetroopwage stoon en ‘zien’ Tempeleers loupe daorum heen en zalle hun streke aon ’t publiek op de rót tentoenstèlle. Want laote veer ierlek zien; Vastelaovend drejt toch e bitteke op sjoen streke en plezeer en e bitteke oondäög… De rót vaan d’n optoch start bij de statie boe de Groeten Oonbekinde tege 13:22 oor zal vertrèkke. Via de Wycker en de Mestreecher Brögkstraot, geit heer via de Groete Staat de Spèlstraot op riechting Merret, boe um 15:11 oor d’n demasqué plaotsvint en gans Mestreech eindelek wèt wee de nuien Hoegen Hoeglöstegheid is.