De kebouters
Marion Niland en Frens Peters zien de Vastelaovendvierders vaan ’t jaor 2022. ’t Koppel viert al sinds 2013 carneval in Mestreech es ‘de kebouters’.
Marion is vaan oersprunk Nijmeegse en kaom in 1987 in Mestreech studere. Zie woort verleef op Mestreechteneer Frens. Inmiddels woent ‘t koppel al jaorelaank in Braobant. Vastelaovend viere in ’t Braobantse land? “Biste gek”, zeet Marion in oonvervals Mestreechs.
’t Idee veur de kebouter-act oontstoont oonder mie umtot zoewel Marion es Frens neet al te groet zien. Daobij zeukde ze get um op te stoon, zoetot ze beveurbeeld op vastelaovendsdinsdag toch sjoen kóste mètkriege wie de Vastelaovend woort aofgeslote.
’t Woort ’n keerke boe ze alletwie bij wijs vaan standbeelde in stoon. Veurbijgengers kriege daan aoventouw ’n pats op hun koont mèt de sjoemrubbere hamer en dat zörg daan weer veur hilariteit bij de twie kebouters zelf. “Veer höbbe ouch e pötsje op de kaar stoon en es iemes dao e muntsje in goejt, doen v’r ’n denske. Dat heet zelfs ’n paar jaor deveur gezörg tot v’r mèt mie cent thoes kaome es tot v’r hadde oetgegeve.”
Aongezeen de kebouters al sinds 2013 hunnen act opveure, kraoge zie al dèkser te hure tot ze wel ‘ns tot Vastelaovendsvierder vaan ’t jaor zouwe weure oetgerope. In 2023 waor ’t daan zoewied en woorte zie beneump tot Vastelaovendsvierder 2022.