De Tempeleers zeuke ‘ne Stadsprins

“Veer en ‘n haaf week daogeleks mèt ‘ne groete glimlach veerdeg stoon veur ‘t ‘Vastelaovendvierend Volk vaan Mestreech’. ‘t ‘Vastelaovendsgeveul’ nao väör bringe. Steun beeje aon kraanke. Danse mèt gehandicapte, kinder weegwies make in de traditie vaan de ‘Mestreechter Vastelaovend’, studente betrèkke bij Mestreechs weerdevolste evenemint en ‘t boegbeeld zien vaan carneval dat jaor.” ‘t Zien inkel veurbeelde die Armand Peereboom, Stadsprins vaan 2019, oet ziene mouw sjöddelt es häöm gevraog weurt nao d’n inhaajd vaan ‘t Stadsprinsschap. “Dao koume netuurlek nog väöl mie sjoen en oonverwachse zake kieke bij dees ierefunctie”.

Stadscarnevalsvereineging de Tempeleers oet Mestreech is weer op zeuk nao dé Stadsprins veur 2020. Heiveur reup de vereineging de hölp in vaan “ ’t volk ”. “V’r hure gere vaan Mestreechtenere wee zie gesjikde kandidaote vinde. ’t Is neet de bedoeling tot iemes ziechzelf aondreug. V’r zien mèt naome benuit wie iemes op aandere euverkump“, aldus oetbelder Odin Wijnhoven. Heiveur deent e formuleer zoe compleet meugelek ingevöld te weure. Dit is vaanaof 1 september tot 11 november te downloade en in te völle via de website vaan de Tempeleers.

“Uiteraard zien dao e paar criteria boe euzen touwkomstege stadsprins aon moot voldoen. Zo moot euze kandidaot in Mestreech woene, ’t Mestreechs beter es de bèste spreke, enthousiast en aimabel zien, ‘nen echte carnevalsvierder zien en in staot zien um mèt ederen inwoener vaan de stad op zien/häör niveau te spreke”, aldus Wijnhoven. Peereboom kiek nog ‘ns mèt e plezereg geveul trök nao ‘zienen’ tied: “Iech had dit veur gei goud wèlle misse! Ederen daag flitse wel weer dinger door miene kop die iech höb mètgemaak in dee korten, intensieven tied. Iech roop daan ouch ederein op um kandidaote op te geve. ‘t prinsschap gun iech ederein!”

De kins hei 't formeleer downloade!

terug naar nieuws overzicht