Mie regie op ‘Boonte Störm’

Stadsvastelaovendsvereineging De Tempeleers geit get mie rezjie voere op e soepel verloup vaan de Boonte Störm, de groeten optoch op carnevalszoondag. Reie daoveur is tot de stoet de aofgeloupe jaore qua tied form oetleep, boedoor de lèste gróppe pas ruim nao ’t invalle vaan d’n duuster aonkaome bij ’t indpunt. “Dat gaof ummertouw mie irritatie”, zeet oetbelder Odin Wijnhoven vaan De Tempeleers. “Neet allein bij de deilnummers, meh ouch bij de hölpdeenste, De Trekkers en de Tempeleers zelf, die same zörge veur e good verloup vaan d’n optoch”.  

Um de opttochte get gawwer en soepeler te laote verloupe, maag in Wyck allein nog opgestèld weure op de Lieg Barakke, de Bourgogne en de Hoeg Barakke. Daoneve weure de tije boe op de deilnummers dene te vertrèkke nog strakker gepland. Bij de start, aon de Kesselskade en op ’t Vriethof weurt ’t aontal begeleiende Trekkers en Tempeleers oetgebereid. Zie numme mie rezjie, veural es de stoet dreig stèl te valle, wie dèks ’t geval is bij ‘Zienen Hoegen Hoeglöstegheid’. Wijnhoven: “De Boonte Störm hèlt ziene, oongedwonge en carnevalesk karakter, dat is gein discussie. Me hum ’t veur ederein leuk te hawwe, wèlle v’r get mie grip kriege op ‘t verloup.”