Hölpdeenste geïerd mèt thema Prins Oetrope

Medaajes 2019

Pelitie, handhavers, ambulancemètwèrkers en brandweer. Ofwel: de hölpdeenste. Zie stoon centraal bij ‘t Prins Oetrope op zoondag 3 fibberwarie. De ‘hölpdeenste’ vörme dit jaor ‘t thema vaan d’n optoch dee de Groeten Oonbekinde begeleit nao ‘t ‘benkelek momint’ op de Merret. De Tempeleers goon daorum verkleid es ‘deenders’ en boeve, de Groeten Oonbekinde zelf steit es hoofcommissaris vaan pelitie op de wage.

De 'Govies'
Gehiel volgens de traditie is ouch de Tempeleersmedaaje gekoppeld aon ‘t thema. De Tempeleers Orde heet dit jaor de naom ‘de Govies’. De medaaje bouwt daomèt de verbintenis vaan de Vastelaovend mèt de govies wijer oet. Zoe zien agente mie es oets oonderwerp vaan leedsjes, beveurbeeld ‘Meer, dao ligk ‘ne Govie in ’t water’ en ‘Menier d’n Deender’. Ouch goon jaorleks twie groete Govies mèt in de Boonte Störm. Netuurlek zörge de echte ‘govies’ same mèt de aander hölpdeenste eder jaor veur ‘ne veilege en ‘propele’ Vastelaovend. De Prinsemedaaje, neet gekoppeld aon ‘t thema, is dit jaor getiteld ‘de reiperok’. Ouch bekind vaan e Vastelaovendsleedsje: ‘Meer, komp oet dee zedeleer’ (hool dee reiperok mer oet de kas). ‘t Dialekwoord veur hoepelrok seert de medaaje die door de Stadsprins vaan Groet Mestreech weurt oetgereik. Neve de twie ordes, weure kinder verierd mèt de kindermedaaje of ’t Kinderknuipke.

Rót optoch Prins oetrope 
D’n optoch op zoondag 3 fibberwarie nao de Merret begint roond 14.00 oor veur ‘t Stationsplein en trèk via de Wiecker Brögkstraot, euver de Sint Servaosbrögk, door de Mestreecher Brögkstraot, Kleine Staat, Groete Staat en Spilstraot nao de Merret, boe roond 15.11 oor d’n demasqué verwach weurt. Veurtot ’t Maske aofgeit weurt iers nog stèl gestande bij Rolam Nievergeld en zie gezin, die in de Zwoer, meh plezerege daog vaan de Vastelaovend, Mestreech in 2018 veurgónge.

terug naar nieuws overzicht