Remy Rousseau nuie ceremoniemeister

Remy Rousseau en Annemarie Penn

Stadscarnavalsvereineging De Tempeleers heet in Remy Rousseau häöre nuie ceremoniemeister gevoonde. Rousseau volg René Persoon op, dee nao twie jaor aofsjeid nump.  

Remy Rousseau is sinds 2017 aon de Tempeleers verboonde en krijg tijdens de jaorvergadering op vriedag 16 november de ceremoniemeisterstaaf officieel euverhandeg. Veur de 45-jaorege Rousseau is ‘t ceremoniemeistersjap ‘ne jongesdroum dee oetkump. “Al vaanaof ‘t momint tot de Euverdrach vaan de Mach op tv te volge is, zit iech aon de buis gekluisterd en höb iech genote vaan mien veurgengers. Jan Janssen, Norbert Frijns en René Persoon höbbe ‘t allemaol op hun eige meneer gedoon. Ouch iech zal mienen eige weeg hei in vinde, mèt hölp vaanoet de Tempeleers in de persoen vaan neet zoemer iemand, meh vaan Jan Janssen!”.  

De zeuktoch nao ‘ne nuie ceremoniemeister is medein nao karneval 2018 in gaank gezat. “V’r höbbe ‘n zeukkemissie samegestèld en dees kemissie heet ‘ne profielsjets gemaak. Daonao is de vakkatuur binne de vereineging oetgezat. Remy waor medein enthousias en mèt häöm höbbe v’r ’n aontal kier um taofel gezete um d’n inhaajd vaan de funktie te bespreke. ’t Geit, neve de Euverdrach vaan de Mach, netuurlek ouch euver ‘t protocol en ‘t introducere vaan de Stadsprins en Tempeleers bij officieel aongelegenhede. Gaondeweeg de gesprekke waore v’r al gaw devaan euvertuig tot Remy de zjuste persoen waor. Heer heet charisma, humor, weit ziech good te presentere en hèlt vaan ‘n oetdaging”, aldus woordvoerder en veurzitter vaan de zeukkemissie Odin Wijnhoven.  

Wie de traditie ‘t veursjrijf zien de Tempeleers iers bij de börgemeister langsgegaange um touwstumming te vraoge. Odin Wijnhoven: ”Börgemeister Annemarie Penn-te Strake is es besjermvrouw aon eus vereineging verboonde. Daoneve is zie bij de Euverdrach vaan de Mach netuurlek de mies importante opponente vaan euze ceremoniemeister. ‘t Is wel zoe fijn es alletwie de betrokkene wete wat ze aonein höbbe”.    “Dat die Rousseau zijn borst maar alvast nat maakt”, völt börgemeister Penn-te Strake aon. “Zoonder meujte höb iech al e kajeeke vol euver dit gemeintebestuur”, zeet Rousseau. Börgemeister Penn-te Strake “Nee, zoonder flauwekul, ik vind het fijn dat er een jonge enthousiaste Tempeleer deze functie wil gaan invullen. Ik verheug me erop om de komende jaren samen te duelleren, met als inzet de macht over Maastricht tijdens de drie carnavalsdagen aan de stadsprins”.

terug naar nieuws overzicht