René Persoon stop es ‘ceremoniemeister’

Otoriteitentoeker René Persoon stop nao twie jaor es ceremoniemeister en es lid vaan stadsvastelaovendsvereineging De Tempeleers. Persoon naom ‘t stekske euver vaan Norbert Frijns, dee de funktie veer jaor heet bekleid.

Aonleiing is de veranderde werksituatie vaan d’n oondernummer. René Persoon:”Iech bin de Tempeleers zier daankbaar veur ’t vertrouwe dat ze in miech höbbe oetgesproke. Meh door mien drökke wèrkzaomhede oontbrik miech d’n tied um mie Tempeleerslidmaotsjap nao behure in te völle. De moos get good doen of de moos ’t neet doen!” 

De Tempeleers zien Persoon daankbaar veur zien bijdrage aon de vereineging. “Neet allein veur de bijdrage vaan René bij de ‘Euverdrach vaan de Mach’, meh zeker veur zienen inbring um nui financieel merrete aon te baore. René is oondermie mèt verantwoordelek veur de opriechting vaan de Sósjeteit veur Medaaljes & Sjariteit’ en de organisatie vaan ’t evenemint ‘Soirée de la Charité. Dees nui initiatieve lievere de stadsvastelaovendsvereineging ’n gooj, struktureel bijdrage op um aktiviteite te organisere”, aldus prizzedent-Tempeleer Henk de Jong. Wie Persoon betrokke blijf bij dees initiatieve is nog neet bekind. 

De Tempeleers goon de koumende weke gebruke um ’n nui profielsjets te make veur de opvolding vaan René Persoon es ceremoniemeister. Daoneve wach de vereineging zoewiezoe ‘ne spannenden tied, umtot op korte termijn de nuie prizzedent moot weure geprizzenteerd. Ouch ’n aontal aander funkties binne de vereineging zien, door de termijnbepaolinge in de statute, vakant.

terug naar nieuws overzicht