Groeten Oonbekinde es Stadsreus Gigantius (tevens thema Tempeleers 2018)

Gigantius

In naovolging vaan de ode aon Mao & Truus (2016), Garderizzjemint “De Kachelpiepers” (2017) make de Tempeleers dit jaor ‘n ood aon de zjubilerende Stadsreus Gigantius en zie gilde.  

Groeten Oonbekinde es Stadsreus
Um bij ‘t 50 jaoreg zjubilei en ‘t belang vaan ‘t Reuzegilde Gigantius veur de stad Mestreech stèl te stoon, höbbe de Tempeleers Gigantius tot ‘t oetroepthema veur 2018 gemaak. Zoe weurt de Groeten Oonbekinde op zoondag 14 jannewarie 2018 es Stadsreus Gigantius door de Tempeleers begeleid nao de Merret. De Tempeleers speule de rol vaan börger, riek of erm oet d’n tied vaan de reus.  

Tempeleersmedaaje
Ouch de Tempeleersmedaaje geit hielemaol in ‘t teike stoon vaan Stadsreus Gigantius. Zoe geit de noe nog Groeten Oonbekinde es Stadsprins vaan Groet Mestreech, persoene oondersjeie mèt de Tempeleersmedaaje in de gradaties Ridder, Offeceer, Kommandäör en Groet Offeceer in de Orde vaan Gigantius. De Prinsemedaaje geit oetgereik weure in de Orde vaan de Keneknap. Lui die ‘n oondersjeiing vaan de Stadsprins oontvaange, kriege die umtot ze ziech op ‘n bepaolde meneer verdeenstelek gemaak höbbe veur Mestreech en/of de Mestreechter Vastelaovend.  

Rót optoch Prins oetrope
D’n optoch op zoondag 14 jannewari nao de Merret begint roond 14.00 oor veur ‘t opgeknap Stationsplein en trèk via de Wiecker Brögkstraot, euver de Sint Servaosbrögk, door de Mestreecher Brögkstraot, Kleine Staat, Groete Staat en Spilstraot nao de Merret, boe roond 15.11 oor d’n demasqué verwach weurt. Veurtot ’t Maske aofgeit weurt iers nog stèl gestande bij Jerôme Slakhorst en zie gezin, die in de Zwoer, meh plezerege daog vaan de Vastelaovend, Mestreech in 2017 veurgónge.

terug naar nieuws overzicht