Wendy Wasbauer nui oontwerpster medaajes Tempeleers

Wendy Wasbauer nui oontwerpster medaajes Tempeleers

Portrètsjèlder Wendy Wasbauer weurt de nui oontwerpster vaan de medaajes vaan Stadsvastelaovendsvereineging De Tempeleers. Wasbauer volg heimèt Jos Krebbeks op, dee zjus nao karneval 2017 storf.

Wasbauer gedruimpde oontwerpster
Wendy Wasbauer is verierd mèt häör nui opdrach. “ ‘t Is spannend en oetdagend tegeliek. Iech höb netuurlek väöl hiel gooj oontwerpers veur miech gehad”. Medaajesjatbewaorder Frits Jongen is verhäög tot Wasbauer ‘jao’ op de vraog vaan de karnevalsvereineging zag: “Nao ’t sterve vaan Krebbeks, dee ruim 11 jaor de medaajes veur us heet oontworpe, móste v’r op zeuk nao ‘ne nuien oontwerper. De naom vaan Wendy veel eigenlek medein, ze waor eus gedruimpde oontwerpster. Veer dinke tot zie mèt häöre stijl de aofbeeldinge veur dees veurnaom oondersjeiinge, die de Stadsprins uitreik, perfek wèt te oontwerpen”, aldus Jongen.

Euver Wendy Wasbauer
Wendy Wasbauer (1976) waor vaan-jongs-aof-aon al bezeg mèt ‘t teikene en sjèldere vaan geziechte. Nao häöre middelbaresjaoltied heet ze regelmaoteg les gehad vaan versjèllende gerenommeerde (portrèt)sjèlders die häör de techniek lierde en fien kniepkes vaan ‘t vak lete zien. Gedurende dees lèsse heet ze häören eige stijl weite te oontwikkele. Nao get umzwervinge besloot ze in 2006 um häör passie volledeg te volgen en vestegde zie z’ch es professioneel portrètsjèlder in häör geboortestad Mestreech. Zie maak inmiddels naom mèt häör werk en oontvingk opdrachte oet de ganse Benelux. “ ’t Sjèldere vaan e portrèt is zoeväöl mie es allein mer ‘t plaotse vaan de zjuste kleur in de zjuste vörm op de zjuste plaots. ‘t Is ‘t vaange vaan de persoenlekheid vaan iemes dat miech ‘t mieste interesseert en boe iech nao op zeuk gaon. Wee is dee persoen en wat maak dee persoen noe zoe uniek? ‘t Antwoord op die vraog perbeer iech te vaange in e leventeg portrètsjèlderij dat ‘t karakter vaan de desbetreffende persoen liet straole.”- Aldus Wasbauer

Wendy zal vaanaf 2018 de medaajes veur de Tempeleers goon oontwerpe.

terug naar nieuws overzicht