Wie ’t allemaol begonne is

Wie ’t allemaol begonne is

Momus

De sjósseteit Momus (1839-1939) waor gein oetgesproke carnavalsvereineging. Zie deeg altied mèt aon ’t organisere vaan openbaar fieste en alzoe ouch vaan de vastelaovend.

Dao waore bepaolde attribute en gebäörtenisse die oetslutend en allein in han vaan Momus waore, zoewie de plaquèt ( ’t sjabbeleer) de Zwarte Adeleer mèt dao-oonder de halve maon in goud in de Orde vaan ’t Joonk Leech, ’t Momuskanon, de kollektebös, de Pegasus, ’t insjete vaan de vastelaovend op ’t Vriethof (De Zwarte Adeleer waor euveregens op 22 jannewarie 1928 door de AKV (Aachener Karnevalsverein) es ’n bezunder oondersjeiing oetgereik aon de sjósseteit Momus tijdens ’n zitting in Aoke).

Ind jaore derteg vaan de veurege iew woorte de carnavalsaktiviteite georganiseerd door ’n kemissie die boete de Momus um wèrkde en ziech ’t “Carnavalscomité” neumde.

Samestèlling carnavalscomité 1936 t/m 1939

Veur de jaore 1936, 1937, 1938:De Hiere N. Kessen, Ant, (Veurzitter), Bonhomme, Léopold (lid), Marres, Willy (lid), Schreuder, Léon (lid), Thewissen, Charles (lid)In 't jaor 1939:De Hiere Tans, J. (Veurzitter), Noorden van, J. (Sikkertaris), Dittrich, L. (Penningmeister), Bekker, Giel (lid), Kan van, H. (lid), Kemmerling, Charles (lid), Kemp, Mathias (lid), Linckens, C. (lid), Loontjens, Alex. (lid), Paris, J. (lid), Rosier, G. (lid)

Dit comité organiseerde de carnavalsfieste in samewèrking mèt diverse sub-kemissies: kemissie veur peers- en propaganda, optoch-kemissie, technische kemissie, kemissie veur straotversering, kemissie veur de kindervastelaovend en kinderkestuumwedstrijd.

De prins kaom altied oet ‘ne gróp (sjósseteit of vereineging). Dees sjósseteit of vereineging verzörgde daan metein de prinsegróp in d’n optoch.

Lies (chronologisch) vaan veur-oorlogse “stads”-prinse

1936 Prins Carnaval Stroom, Jos Veurzitter Vereineging Kunst en Vermaak
1937 Momusanus I Knols, Giel Vereineging De Klep
1938 Carolus Momesaurus II Kemmerling, Charles Sjósseteit Momus
1939 Bertus Nihilanus I Retrae, Hubèrt Veurzitter De Vereineging (aofgesjeie gróp vaan Kunst en Vermaak)

Wie ’t nao d’n oorlog weier ging bliek oet ’t volgende verslaag: “Op 11 October 1945 is ene gek op bezeuk gegaange bij Tans, Veurzitter vaan ‘t Vastelaovends Comité 1939, met ’t veurstel ’t aajt Comité nao hoes te sjikke en e nui op te riegte. Naodat alle aofgedaankte ‘ne epistel ontvaange hadde en towstumming hadde gegeve, de organisatie vaan de Vastelaovend oet han te geve, naom de gek alles euver en belag ’n conferentie met de hiere: H. Retrae – Dr. Tans – J. Daniëls – en P. Chambille op 31 October 1945. Ze waore allemaol dao, behalve de lèste, dee toen sjus boekpijn had.

Op ’t ind koume veer euverein, dat hei ’n Vastelaovendsvereiniging opgerieg meus weure en dao woord en nui vergadering oetgesjreve op 7 november 1945.Hei op waore aonwezig: Dr. Tans – P. Chambille – H. Retrae – Fr. Thewissen (De Gek) – Dr. Heydendael – Ch. Kemmerling – L. Daenen – H. Pieters. Op dees conferentie woord bijgaonde lies opgestèld en woorte de dao op veurkoumende naomen oetgenudig tot ’n nui vergadering. Deze woord gehouwe in de Momustempel op 16 November 1945.Heiop waore aonwezig: de hiere: P. Chambille, L. Chambille, L. Daenen, S. Heunders, J. Heydendael, C. Kemmerling, H. Kortebos, E. Nève, G. Rombouts, E. Smeets, J. Smeets, J. Souren, Fr. Thewissen.Veur de flawwe köl waore neet dao de hiere:J. van Aubel, G. Tans, H. Pieters, C. Müller, Groutars, B. Wijsen. H. Retrae, J. Eberhard, J. Dresen, J. Tuinstra.Toch woord euver gegaange tot de stiegting vaan de Mestreegter Vastelaovendsvereiniging, dee es naom geit voere "De Tempeleers”, umdat de vereiniging zitting heet in de awwe Momustempel en neet kin leeve zoonder e flink glaas beer. (…)

Tot lid vaan de vereiniging kin towtreye elke Vastelaovendsgek, joonk of aajt, riek of errem. Nao dees beslissinge woord ’t nui kinneke gedeup met e rundsje awwe klaore door den Oppertempel. Um 11 oor woord de kleine ingebakerd en kraog ’t bestuur de opdrach good veur um te zörrege en de tempelhiere ginge nao hoes.Toen op 23 November 1945 de wijze raod weer same aon de greun taofel zaot, woort de nuie baby z'n voul brook oetgedoon en dao koume de veurstelle te veurschein, die ’t bestuur inein gedreyd had.(…)

Vervolgens woort de installatie vaan de Raod vaan Elf veurgedrage es ierste officieel optreye vaan de nui vereiniging. Heibei zow daan weijer ’n symbolische euverdrach plaots vinde vaan ’t vastelaovendsplezeer door de aw Momus, die mèr allein sjien doed is, inplaots vaan hartstikke doed.Dit alles woord in eerbiedig stelzwiege aongehuurd en goodgekeurd. De Raod vaan Elf ging toen ter Stumbus euver ’t towtreye tot de “federatie der Maastrichtse Vereenigingen”of neet. D’n oetslaag waor towtreye en zoe woort ’t kinneke lid vaan de federatie, oonder veurwaarde dat eus vereiniging ’t monopolie heet op organisatie vaan de vastelaovend in Mestreeg. Zoe verleep de ierste week vaan ’t platkeend, dat noe opgevood moot weurde tot de groetste vastelaovendsgek vaan Mestreeg.”

De Momus sjòsseteit

momus logo