Vastelaovendsvierder 2010

Vastelaovendsvierder fullscreen 2010
Geachde aonwezege, van us zeet geer geweend tot veer e gedege en deepgaond oonderzeuk plege nao de antecedente vaan ‘nne meugeleke Vastelaovendsvierder boebij veer “ hard-Leers “ kieke nao de integriteit vaan de persoen of persoene en of heer /of zie -genege is / of zien , um gesnoje oet ’t zjuste Vastelaovendshout mèt Mestreechter esprit dee Vastelaovend door te bringe. Oetenaard maag dat dudelek zien tot veer hei neet mèt bedoele tot dee Vastelaovend örges op de pistes vaan de wintersport gevierd kin weurde.

Es veer naor ziene indrökwèkkende CV loere daan hoof heer neet besjeie te zien, gezeen ’t feit tot heer veur ziene inzat bij diverse organisaties in Mestreech al keuninklek oondersjeie is. Heer grosseert in bestuursfuncties en deit dat mèt verve. Zoene mins moot toch ‘ne eerdsingel es besjermingel höbbe of neet soms. Blijf veur häöm daan nog wel tied euver um ziech op ’n ordentelek meneer mèt de Vastelaovend dedoor te goeje?
Oordeilt zelf en iech citeer oet ziene CV:
heer is al Prins gewees bij de Veldmuis, heer heet Allebenör opgeriech, is de spèl in de Heugemse gemeinsjap en Vastelaovend en behiert de kretserij vaan ’t Vollekstheater. Es ’t daan Vastelaovend is daan trèk heer in Mestreech en Heugem drop oet . Es dat in de vegilie vaan de Vastelaovend is , nog in e aajd muzikante pekse meh later nao de Heilege daog op aon wie ’n aajd wief, ’n evermenneke ‘ne piloot of in ’t good Frans kostuum meh altied oonder de besjerming vaan ziene patroen Sint Misjèl oet Heugem. Um dee Vastelaovend dèks te beëindege mèt ‘ne komplete nachteleke optoch roond ’n oor of drei op Vastelaovendsdinsdagnach.

Dames en hiere mèt väöl plezeer is noe bekind de Vastelaovendsvierder 2010;

                                         Harrie Beckers

Zoe wie bekind zal de proclamatie vaan dizze ieretitel op Vastelaovendszoondag geannonceerd weurde tösse de negende en de tiende sjeut vaan ‘t Momuskenon , ’t welk bevesteg zal weurde door euverhandeging vaan ‘ t Momuskenönsje

Naomes de Kanselarijraod en ’t bestuur
Jean-Louis H.A. Tuinstra, Vice-Prizzedent