Trossjer actie

Bèste vrund of vrundin vaan de Mestreechter Vastelaovend,

Wat höbbe veer ’ne sjoene zomer gehad, de naojaorsblaajer zien noe eweg en de winter heet z’nen entree al gemaak. De gezèllege aovende thoes,  Keerstied, aajd op nui, ’t steit allemaol alweer veur de deur. Boe blijf d’n tied….. meh bij väöl lui geit noe ouch ’t blood weer lankzamerhand sneller struime. ’t Vastelaovendsleedsje 2012 is bekind, de Cuvée Momus is gelanceerd en ’t oetrope vaan de Stadsprins is aonstaonde en dus… naodere de drei sjoen daog vaan Carneval.
’ne Carneval dee veer es Tempeleers gere veur uuch, meh veural, same mèt uuch vörm wèlle geve.

Um Mestreech dee Carneval te geve zoewie veer dee, same mèt uuch, gere wèlle organisere höbbe veer zoewie gezag eur hölp nudeg. Eder jaor is ’t weer lesteger um de financieel tuikes aonein te binde. ’t Is daorum tot ’t zoonder eur financieel bijdraog veur us neet meugelek is um ’t Carnevalsfies good vörm te geve.

Veureg jaor höb geer bezeuk gehad vaan euzen eige Gerard Slakhorst, dee weer en wind trotseerde um bij uuch persoenelek te vraoge veur ’n bijdraog aon dee Vastelaovend.
En dus wèlle veer uuch, vaan ganser harte, verzeuke um euzen trósjer, neet mèt leeg han weg te sjikke es heer bij uuch kump aonkloppe.

Op dit momint kinne veer geinen exacten daotem en oor aongeve tot heer bij uuch langs kump. Meh nump vaan miech aon: heer kump gere bij uuch langs. Heer zal uuch persoenelek de vraog stèlle um bij te drage aon de organisatie vaan ’t Carnavalsfies. Of geer mèt wèlt doen hingk netuurlek gans vaan uuchzelf aof. Meh iech kaveer uuch, tot eder bijdraog us geweldeg zal helpe bij de organisatie vaan eus sjoen traditioneel Carnevalsfies.

Es geer besleet um deil te numme aon eus Trósjer-Actie oontvangk geer neet allein e bewies vaan deilnaome meh dingk geer ouch mèt nao ’t manjefiek broonze beeld “La Folie”.  Dit beeld dat speciaol veur dees actie eder jaor gemaak weurt door mevr. Henriëtte Schrover, nao ’n oontwerp vaan Th. Schaepkens, weurt naomelek verloot oonder de deilnummers aon de Trósjer-Actie. Iech kin uuch kavere tot dit beeld inmiddels e woer collectors-item is gewore. Moch geer de gelökkege winner vaan dit beeld zien daan zal de Stadprins persoenelek dit beeld aon uuch koume oetreike.

Iech zouw uuch, persoenelek en naomens De Tempeleers, daan ouch vruntelek wèlle vraoge:
 “Es euzen trósjer bij uuch langs kump, sjik häöm daan neet mèt leeg han eweg”.

Naomens De Tempeleers verblijf iech inmiddels, mèt uuch ’nen oprechte Merci en ’ne  Zaolege Keersemes en e gelökkig 2012 touw te winse,

John Zeguers
Veurzitter financieel kemissie
De Tempeleers Mestreech

(ING-baank: 67.97.11.880, t.n.v. Stg. De Tempeleers, o.v.v. Trósjer-Actie).