Vrouw Wielemösj.

Op 9 jannewarie 1976 teikende keuningin Juliana de opriechtingsoerkonde vaan de nui Rieksuniversiteit.
Eindelek, nao väöl gedöld, had Mestreech ’t kroenzjuwiel dat in de koumende jaore ’n aw industriestad rezzeluut zouw verandere.
Väöl aw gebouwe woorte betrokke door de universiteit, boedoor de bedaorde oetstraoling vaan de  aw binnestad e stök esprit hervoond.
Väöl wiechteger evels waor de koms vaan die doezende studente die e pläötske binne de Mestreechse gemeinsjap mooste zien te vinde, die op häör beurt mós liere um ruimte te geve aon ‘ne gróp jongere, die wieneg of niks vaan ’t leve in Mestreech wiste of begrepe.
Me huurt wel ‘ns bewere tot ’t geveul veur Vastelaovend met de mojermèlk weurt ingegeve.
Stèl noe tot dat ouch zoe is, veur de  Mestreechteneer is dat ’n oetgemaakde zaak, daan zouw dat min of mie beteiken tot in de Vastelaovendsperiood ganse volksstamme in Mestreech ziech verlore zouwe loupe.
Veur aajd-journalis Huub Noten waor dat neet te proume.
Heer zeukde en voont ’n meneer um de studente die dao in geïntreresseerd waore bij de Vastelaovend te betrèkke. Neet ’t Mooswief, meh de wereldbereumde ‘hospita’ door de iewe heer d’n ingel-bewaorder vaan de studente, zouw häör pupèlle e pläötske bezörge in ’t Vastelaovends-gebäöre.

Door De Tempeleers is ’n groete póp gemaak die in presentie vaan alle sóssjeteite plechteg is geduip es “Vrouw Wielemösj”.
‘t Loot heet oets bepaold in wat veur volgorde de sóssjeteite tijdens ’t Vastelaovendssezoen euver Vrouw Wielemösj mote wake. De aander sóssjeteite mote probere Wielemösj in han te kriege, um häör veur väöl beer trök te geve, zoetot de rechmaotege bezitters vaan e bepaold jaor op carnavalszoondag met häör in de groeten optoch kinne proonke.
 
Op dees meneer is ’t gelök um Vastelaovend en de studente korter bijein te bringe.

Door 't organisere vaan 'n ludieke loterij oonder de Mestreechter studente-organisaties weurt de jaorlekse patroenage geregeld. De póp die " Vrow Wielemösj" veurstèlt , weurt jaorleks op de Inkom getoend en in de Vastelaovendperiood mèt eineg sirremonieel euvergedrage.

De lèste loting waor in 2004:
Voogd in 2004:      Amphytrion
Voogd in 2005:      Lagakari
Voogd in 2006:      Tragos
Voogd in 2007:      MDF
Voogd in 2008:      Saurus
Voogd in 2009:      Circumflex
Voogd in 2010:      Koko